BEMI estas la Biciklista Esperantista Movado Internacia, la faka sekcio de TEJO pri biciklado.
BEMI aranĝas plurajn internaciajn biciklo-karavanojn (biciklovojagoj de unu loko al alia) ĉiujare; krome BEMI-semajnojn (pluraj ekskursoj el la sama bazejo), kaj BEMI-ekskursojn (facilaj unutagaj bicikladoj). BEMI ankaŭ servas kiel kontaktilo por tiuj biciklemaj esperantistoj, kiuj preferas solaj vojaĝi. Kaj BEMI partoprenas en politikaj agadoj por la popularigo de biciklado, kaj por pli bonaj kondiĉoj por bicikla trafiko.

BEMI ne konas formalan membrecon; ni simple invitas ĉiujn homojn, kiuj parolas Esperanton kaj ŝatas bicikli, konsideri sin membroj de BEMI.

Tiuj BEMI-anoj kunvenas regule unufoje jare por demokratie decidi pri la evoluo de la asocio. Tiu membrokunveno tradicie okazas ĉirkaŭ la jarŝanĝo en la renkontiĝo JES en meza Eŭropo.
Ankaŭ somere (nordhemisfere) en la IJK (Internacia Junulara Kongreso) BEMI-anoj kutime kunvenas por plani karavanojn kaj aliajn eventojn.