La salono de la evento fakte estas tre bela kaj komforta, vi sentos vin kvazaŭ vi estas en sesio de UN!
Ĝi situas en la anekso de la Leĝodona Palaco, tio estas ne en la meza granda konstruaĵo sed fronte al ĝi, maldekstre de strato Colombia. La salono estas numero 17, nomata «Sala Doctora Paulina Luisi», en la suba etaĝo.
Vi nepre iru kun identigilo por rajti eniri la ejon, ĝi ja estas tre oficiala – tie estas la oficejoj de ĉiuj deputitoj de Urugvajo!

Do, ni atendas vin je la 9a matene laŭ la loka horzono, kaj ekde la 8a por tiuj, kiuj jam anoncis ke helpos.
Ĝis tiam!

1- Spektu la eventon vive en la jutuba kanalo de UEA: https://www.youtube.com/live/9whasT4yCAk
2- Partoprenu la eventon per Zoomligilo: 

https://us02web.zoom.us/j/89585981089 

Organizantoj de la evento: Urugvaja Esperanto-Societo, UEA, TEJO kaj ILEI.

La 10-an de decembro 2024 la Esperanto-komunumo festos la 70-an datrevenon de la Rezolucio de Montevideo, grava mejloŝtono, kiu markis la unuan oficialan agnoskon de Esperanto fare de Unesko kaj la komencon de la oficialaj rilatoj de UEA kun tiu organizaĵo. Akceptita en 1954 dum la ĝenerala konferenco de Unesko en Montevideo, Urugvajo, ĉi tiu Rezolucio rekomendis al la ĝenerala direktoro de Unesko sekvi la evoluon de la uzo de Esperanto, agnoskante, ke la atingoj de la Esperanto-movado kongruas kun la celoj kaj idealoj de Unesko.

Ĉi tiu sukceso estis rezulto de la persista klopodado de UEA kaj aliaj esperantistaj organizaĵoj, kiuj kvar jarojn pli frue prezentis al Unuiĝintaj Nacioj (UN) petskribon subskribitan de preskaŭ 900 000 personoj kaj reprezentantoj de ĉirkaŭ 500 organizaĵoj, postulante, ke UN esploru la lingvan problemon tutmonde kaj la eblan rolon de Esperanto en ĝia justa solvo. La petskribo estis transdonita al Unesko por konsidero - kaj la rezulto estis malpli radikala, sed historia Rezolucio, kiu donis oficialan kaj konsultan statuson al la Esperanto-movado en Unesko.

Por festi ĉi tiun datrevenon, kaj sub la aŭspicioj de UEA, TEJO, ILEI kaj la Urugvaja Esperanto-Societo, stariĝis komisiono konsistanta el lokaj esperantistoj kaj reprezentantoj de diversaj institucioj de Ameriko. Ĉi tiu komisiono nuntempe laboras por organizi internacian konferencon, kiu okazos la 10-an de decembro 2024, ekde la 9:00 loka tempo (12:00 UTK), en la Leĝodona Palaco (Parlamentejo) de Montevideo, la sama loko, kie oni akceptis la Rezolucion en 1954.

La celebrado inkluzivos prelegojn kaj prezentojn ĉeestajn kaj retajn, ekspoziciojn de dokumentaj filmoj kaj artajn prezentaĵojn. La evento estos malferma al la publiko, kiu povos ĝin ĉeesti persone aŭ partopreni rete.