La Movada Foiro estas unu el la plej viglaj kaj buntaj momentoj komence de la Universala Kongreso (UK). Dum la 111-a UK en Graz, ĝi denove funkcios kiel granda renkontejo de la Esperanto-movado, kie organizoj, kluboj, projektoj kaj iniciatoj prezentos siajn agadojn al la kongresanoj. Dum la Movada Foiro, ni havos unikan okazon videbligi naturismon ene de la internacia Esperanto-movado. Multaj kongresanoj ankoraŭ malmulte konas la ekziston de Esperanto-naturismo aŭ havas nur tre ĝeneralajn ideojn pri ĝi.

Ni klarigos pri naturismo kaj ĝia rilato kun Esperanto. Ni ankaŭ anoncos niajn estontajn agadojn kaj proponos al kongresanoj aliĝi en ili. Nia ĉeesto en la Movada Foiro ankaŭ kontribuas al la ĝenerala diverseco de la UK. Naturismo reprezentas temojn kiel toleremo, korpa akcepto, proksimeco al naturo kaj internacia amikeco — valoroj kiuj bone harmonias kun la humanisma spirito de Esperanto.