Esperanto-Asocio de Finnlando organizas ĉiujare Vintrajn Tagojn en februaro aŭ marto kaj Aŭtunajn Tagojn en septembro aŭ oktobro. Dum Vintraj Tagoj okazos ankaŭ la laŭstatuta jarkunveno de la asocio.

Vintraj Tagoj en Rauma 22.–23.3.2025

Vintraj Tagoj de EAF okazos en Rauma semajnfine, la 22-an kaj 23-an de marto 2025. La kunvenejo estos Rauman vanha kansalaisopisto, lernejo konstruita en la jaro 1827. Ĝi situas meze en la urbocentro inter merkatplaco kaj preĝejo.

La sabata programo konsistos el promena vagado en la malnova urbo gvidata de lokuloj. Dume en la lernejo okazos enkonduka provleciono de Esperanto, malferma al la publiko. La navigadinstituto, fondita en 1880, estos prezentita de ĝiaj eksa studanto kaj instruisto, esperante. En la vespero nin amuzos loka bardo. Je dimanĉo ni konatiĝos turisme kun la mezepoka urbo Rauma (Raŭmo en Esperanto) al Unesko-nomita mondheredaĵo: la malnova urbo, en kies koro ni kunvenos. Ni vidos kaj aŭdos pri Raŭma historio kaj kulturvivo en la historia muzeo Marela kaj en la artmuzeo Pinnala. La Tagoj finiĝos per komuna tagmanĝo, tn. brunĉo. La detala programo kun aliĝkotizoj aperis en Esperantolehti (Esperantobladet, Esperanta Finnlando), en numero 1/2025.

Aliĝu prefere per la reta aliĝilo. Pliaj informoj pri la Vintraj Tagoj haveblas retpoŝte ĉe eaf[at]esperanto.fi .

Bonvenon!

Esperanto-Asocio de Finnlando (EAF)