Ni alternos instruadon pri gramatikaĵoj kun paroligaj rondoj (laŭ la modelo de konversacia maratono) kaj sesioj de Peĉakuĉo (mallongaj prezentoj fare de ĉiu: 20 bildoj kaj po 20 sekundoj). Ĉar ni volas ke ĉiu sentu sin libera paroli, instruistoj kaj akompanantoj ne lingve korektos la partoprenantojn dum la tago, sed diskrete notos eventualajn erarojn. Je la fino de la tago Yves prelegos pri oftaj eraroj kaj anonime atentigos pri plibonigebloj kiujn li kaj aliaj rimarkis. Tiel ni ĉiuj kune lernos kaj progresos.

La kompleta programo troviĝas en la retejo de Esperanto 3000.

Instruos Kristin Tytgat, Lode Van de Velde kaj Yves Nevelsteen. Ni pripensis, ke ni povos instrui al du grupoj samtempe: progresantoj (nivelo B1) kaj progresintoj (nivelo C1). Sed ni vidos tion surbaze de la aliĝintoj; ni ja konas nian publikon kaj maksimume adaptiĝos.

Ni manĝos tagmeze surloke; estas salono kie maksimume 20 personoj rajtas manĝi. Se estus pli da partoprenantoj - aŭ se homoj tion preferas - Lode pretas ekstere manĝi kun grupeto.

Ni planas etan libroservon, sed forte rekomendas, ke vi mendu verkon anticipe. Tio ege helpus nin.

Ni petas kontribuon de 25 eŭroj por la tago.

Lode Van de Velde kaj Yves Nevelsteen, nome de Esperanto 3000.