Zam kaj Dzeka informas :

Eblas renkontiĝi en Parizo, ĉi-Sabate, okaze de la kongreso de SAT-Amikaro, en la Libroservejo de la Amikarejo.

Ni bedaŭras la nuntempan mankon de vivo en la sidejo de SAT-Amikaro, mankas al ni la kara etoso de parolrondoj, de kursoj, mankas vizitantoj el plej diversaj landoj. 

Kvankam pro viruso KV19 la nuna leĝo malpermesas kulturajn okazojn-rendevuojn (inkluzive de societaj kongreso), malpermesas amikecajn man-al-manojn kaj kisojn, tamen rimarku ke aĉetantoj en vendejo ne malrajtas interparoli, se ili renkontiĝas pro hazardo, senrendevue !

Sciante ĉi-tion, eniru la SAT-Amikarejon (la aŭtomata pordo estas riparita), zorge lavu viajn manojn kaj vestu la buŝmaskon, mienu interesiĝi pri la novaj libroj, PIV-2020, Veganismo, Rajto je pigro, Rakonto pri mia vivo (Gaby Tréanton), k.a., kaj efike rekonstruu la mondon : libere interparolu, amike babiladu kun samideanoj !

Ne restu en la izolo de interreto ! – Ne lasu nin en soleco ĉi-tie !

Kore,

Zam & Dzeka, la senmaskuloj kaj sengantuloj

************************************

Nuntempe en la Pariza regiono, je tria fojo, ni re-kvaranteniĝas pro KV19.

Sed ĉi-foje, la librovendejoj rajtas malfermi ! Profitu la okazon, venu por iom diskuti, por "rekonstrui la mondon", kiel antaŭ 150 jaroj faris la revoluciantoj "Communards" de la Komunumo (tiu evento ne nur Parizurba estis) !