La 5-a Virtuala Kongreso de Esperanto (VK) okazos de la 28-a de novembro ĝis la 1-a de decembro 2024! Jam eblas aliĝi al ĝi: https://vk.esperanto.net/2024
 
Ĉiuj individuaj membroj (IM) de UEA povas senpage aliĝi – tamen la aliĝo estas senpaga por IM nur ĝis la 13-a de novembro! Se vi ankoraŭ ne estas IM de UEA, eblas samtempe membriĝi al UEA kaj aliĝi al la VK ĉe la VK-aliĝilo! Ne hezitu uzi ĝin: https://vk.esperanto.net/2024/aligxilo

La 5-a VK estas realigo de Universala Esperanto-Asocio (UEA), en oficialaj rilatoj kun UN kaj Unesko. Gvidas la organizteamon la 1-a Vicprezidanto de UEA, Fernando Maia Jr. Kunrealigas kaj teknike prizorgas la teamo de la neprofitocela esperantista organizo E@I. Ĝia temo estas: "Lingvo, homo kaj medio por pli bona mondo".

La emblemo de la 5-a VK fariĝis la definitiva oficiala emblemo de la VK. Ĝin kreis Toni Espinosa Largo (el Hispanio). La emblemo revokas ĉiujn antaŭajn eldonojn de la VK kaj montras flaman formon, kiu dinamike envolviĝas por reflekti la varmon, pasion kaj daŭran vivforton de la Esperanta komunumo. Ĝi uzas la kernajn primarajn kolorojn (ruĝa, flava kaj blua), kiuj interplektiĝas por krei verdan, oranĝan kaj nigran kolorojn, ankaŭ ĉeestajn en la emblemo de UEA. Tiuj koloroj ne nur estetike kunfandiĝas, sed ankaŭ simbolas unuecon en diverseco. La verda stelo, kiu prezidas la bildon, reprezentas Esperanton kaj la esperon. Ĝi kompletigas tiun desegnan kompozicion, reliefigante la blankan fonon, kiu elvokas la ideon de paco kaj ampleksa spaco por daŭra kreemo kaj agado.

La VK estas la plej granda reta evento por esperantistoj. UEA ĝin organizas ekde 2020. Ekde 2022 ĝi okazas ĉiam fine de la jaro. Ĝi estas riĉa je interesaj prelegoj, artaj kaj kulturaj prezentoj kaj socia programo. Dum la VK partoprenantoj de diversaj landoj interkonatiĝas, lernas ion novan dum la realtempaj diverstemaj prelegoj, partoprenas en kursetoj, atelieroj kaj diskutoj, ekscias pli pri la Esperanto-movado dum la Virtuala Movada Foiro kaj multe pli! Eksciu pli kaj aliĝu al la VK ĉe vk.esperanto.net.