GRAMATIKA SEMAJNFINO – 02.-04.10.2026 – vendredo ĝis dimanĉo – en Kulturladen St. Georg.
Fariĝis bela tradicio, ke ni ĉe elstara instruisto, en agrabla kaj amika etoso, firmigas niajn gramatikajn kapablojn en la Internacia Lingvo. Ĉi-jare ni ĝojas, ke Mauricio Giacometto (Rico) kondukos nin ludeme tra gramatikaj klifoj, tiel ke lernado fariĝu amuza kaj inspira.
Vespere ne mankos amuzo kaj distraĵoj – interalie sceneja legado kun kantoj el teatraĵo de Ralph Glomp.

Kosto por aliĝo ĝis la 31-a de aŭgusto 2026 (post tio la prezo altiĝas je 5 €): 25 €.
Membroj de Esperanto Hamburg e.V. ĝuos reduktitan prezon de nur 15 €.

info (ĉe) esperanto-hamburg.de

La vespera programo dediĉiĝas al historiaj personecoj de nia historio: unuflanke estos bildprelego pri Helmut Schmidt, eksa kanceliero de la Federacia Respubliko Germanio kaj alte estimata senatano de Hamburgo, kiu dum la ŝtorminundo de 1962 organizis kaj gvidis la savagadojn. 

Krome Ralph Glomp prezentos sian teatraĵon „La kaptito de Neustrelitz“ kiel scenan legaĵon kun kantado. La verko temas pri la lasta grandduko de Meklenburgo-Ŝtrelico, Adolf Friedrich la 6-a, kiu en la aĝo de 35 jaroj la 23-an de februaro 1918 falis en la Kamerkanalon apud Neustrelitz kun pafvundo en la brusto kaj dronis. Armilo ĝis hodiaŭ ne estis trovita. Ĉu temis pri akcidento, memmortigo aŭ eĉ murdo?
 
Atentu! La renkontiĝo okazos en Kulturladen St. Georg, Alexanderstr. 16, 20099 Hamburg.