Thomas Bormann, iama Hamburgano kiu daŭre sentas sin Hamburgano, raportos pri siaj aventuroj dum bicikla vojaĝo de Turkio al Germanio. En printempo 2017 li biciklis de Istanbulo al Stutgarto. Antaŭe Thomas vivis kvin jarojn en Istanbulo kaj laboris tie kiel korespondanto por germana radio-reto ARD. Por translokiĝi de Istanbulo al Stutgarto li uzis biciklon: 3.664 kilometroj en kvar semajnoj - tra la eŭropa parto de Turkio, Bulgario, Rumanio kaj Balkano, trans la Alpoj, foje sur densaj stratoj inter ŝarĝaŭtoj, foje sur arbaraj padoj, atakita de hundoj en Rumanio kaj de kuloj en kroataj arbaroj apud la rivero Drava. Li ĝuis renkonti karajn homojn, viziti la Esperanto-muzeon en Vieno, admiri la pejzaĝon ĉe la "Fera Pordego" de la Danubo inter Rumanio kaj Serbio, kaj trapasi tutan ŝtaton per biciklo ene de unu horo (jes, tio eblis en Liĥtenŝtejno!). Nun, post sep-jara paŭzo, Thomas aldonos plian etapon: li biciklos de Stutgarto al Hamburgo por raporti ĉe ni pri la aventuroj inter Istanbulo kaj Hamburgo. 
 
Atentu! Hibrida renkontiĝo okazos kaj en Kulturladen St. Georg, Alexanderstr. 16, 20099 Hamburg kaj rete per ZOOM.
 
Reta renkontiĝo – Ni renkontiĝas ĵaŭde de 19:30 – 21:00 h (UTC+1).  
Ligilo por Zoom estas: https://us02web.zoom.us/j/275937442
La sekretvorto estas la jaro en kiu nia lingvo naskiĝis.