UME (Unuiĝo de Malagasaj Esperantistoj) ofertas kunlabore kun KELI (Kristana Esperantista Ligo Internacia) 5-tagan Esperanto-Seminarion en Antananarivo, la ĉefurbo de Malagasio. Ni atendas almenaŭ 40 partoprenantojn. 

Ni kunvenos en seminariejo proksima al la flughaveno de Antananarivo. Ĝi nomiĝas Résidence Eden Amparafaratany. Temas pri malmultekosta ejo en bela ĉirkaŭaĵo, kie ni rajtas uzi eĉ (kontraŭ aparta pago) naĝbasenon. Malavantaĝo de la ejo estas, ke ĝi disponas nur pri 4 ĉambroj por tranokti - du dormsalonoj por po 20 homoj kaj du malpli grandaj dormĉambroj por po 4 homoj. Atentu ankaŭ pri tio, ke en la duŝejoj estos nur malvarma akvo, kio espereble ne ĝenos vin dum la relative varma vetero.

Interesiĝantoj el Malagasio povas informiĝi kaj aliĝi ĉe Ranja Arc Lydie.

Alilandaj interesiĝantoj turnu sin al Ulrich Matthias (Ulrich.Matthias @ t-online.de). Ni petas de ili solidaran kotizon de 250 € (en 4-lita ĉambro) aŭ 180 € (en 20-lita ĉambro); rabatoj eblas. La aliĝo validas post nia konfirmo kaj antaŭpago de 50 €. La reston vi povos pagi surloke en eŭroj aŭ ariary. La kotizo inkluzivas plenan pensionon, la programon kaj ekskurson aŭ uzon de la naĝbaseno. Provizora programo jam troviĝas inter la dosieroj sube.

Flugbiletoj de multaj eŭropaj kaj ankaŭ de multaj afrikaj urboj al Antananarivo kostas en februaro ĉ. 1.000 € (ekzemple ĉe Ethiopian, tra Adis-Abebo). Por homoj el multaj landoj (ekzemple Eŭropa Unio), Malagasio postulas por restado ĝis 15 tagoj ne vizon, sed nur administran kotizon de 10 € pagendan en la flughaveno. Vakcinadoj ne necesas (krom se antaŭe vi restis pli ol 12 horojn en lando, kie regas flava febro).